आफ्नो पहिचानको खोजीदेखि सामाजिक मापदण्ड र अपेक्षा भन्दा मन पर्ने विषय आफैँले रोजी करियर आफ्नो पहिचान आफैले बनाउँदै गरेको व्यक्त्तिको कथा

म ललितपुरमा जन्मिएँ । विद्यालयमा म कसैसँग बोल्दिन थिएँ, एक्लै बस्न मन गर्थेँ । म केटी भएर प्राकृतिक रूपमा जन्मिए पनि केटाको लुगा लगाउन मन पर्थ्यो । मलाई विद्यालयमा मङ्गलबार र शुक्रबार एकदमै मनपर्थ्यो किनकी तब मैले स्कर्ट लगाउन पर्दैन थियो ।

मेरो सानैबाट केटाको जस्तै हाउभाउ भएकाले लाइनमा बस्ने क्रममा पनि केटाको लाइनमा बस्नुपर्ने भनी जिस्काउने गर्दथे । पढाइमा राम्रो थिएँ तर आफूभित्रको पहिचानको द्वन्द्वमा अल्झिरहेको हुन्थेँ । म किन यस्तो छु, म को हुँ भन्ने पहिचानको आफूभित्रको द्वन्द्व सानैदेखि रह्यो ।

११,१२ मा पारिवारिक रूपमा आमाबुबा दुवै नपढ्नु भएको हुनाले के पढ्नी कस्तो विषय रोज्नुपर्छ भन्ने बारेमा सरसल्लाह दिन सक्नुहुन्नथ्यो । त्यसैले म आफैँले मेरो भविष्यको यात्रा पहिचान गर्नुपर्ने थियो । १० कक्षा पढेपश्चात् मैले बाटोमा जुन जुन कलेजको बारेमा बुझ्थेँ, ती सबै कलेजमा गएर प्रवेश परीक्षा दिएको थिएँ । कुमारी पार्टीको प्रत्येक कलेजमा प्रवेश परीक्षा दिएँ र पास भएपश्चात् कहाँ पढ्ने के पढ्ने भनेर सोच्न थालेँ ।

+२ मा मैले व्यवसाय पढेँ । यतिबेला मैले आफ्नो पहिचानको बारेमा बुझिरहेको थिएँ । विभिन्न इन्टरनेट माध्यमबाट म आफूलाई बुझिरहेको थिएँ । आफू trans man भएको थाहा पाएँ । साथीहरूलाई मैले कलेजमा खुल्लस्त रूपमा भन्न सकेँ र उनीहरू एकदमै सहयोगी र मायालु थियो । अहिलेसम्म साथमा छन् र एकदमै राम्रो सम्बन्ध छ।

+२ पछि राम्रो नम्बर आएकाले समाजको अपेक्षा र निर्धारित बाटोअनुसार ACCA पढे जबकी मलाई आर्टस लिन मन थियो । मैले आफ्नोभन्दा अरुको प्रतिक्रिया र सल्लाह धेरै सुने । ACCA लिए र पास पनि भए तर जब आफूलाई झन झन बुझेँ, मलाई आफ्नो इच्छा रुचि पूरा गर्न मन लाग्यो र मैले 3D Animation को कोर्से पनि पढ्दै छु । घरमा करियर दिशानिर्देशन गर्न सकिँदैन भने आफू नै अगाडि बढी आफ्नो लागि हिँड्न सक्नुपर्छ ।आफ्नो जिन्दगीमा आफ्नो सबैभन्दा ठुलो भूमिका हुन्छ, त्यसपश्चात् परिवार, समाज र अरु

Women in Animation नामक संस्था बाट LGBTIQ हरूलाई 3D animation पढ्न छात्रवृत्ति दिएको हुनाले मैले आफ्नो रुचि र इच्छा पूरा गर्न पाइरहेको छु । विभिन्न संस्थाहरूमा Youth champion को रूपमा अगाडि बढ्न सकिरहेको छु । आफ्नो पहिचान बुझ्दै करियरमा पनि लागिरहेको छु । 3D animation बाट म जस्ता transman, transwomen र अन्य LGBTQ समुदायलाई समाजमा प्रतिनिधित्व गर्न चाहन्छु ।

एसईई दिएपश्चात आफूलाई खोज्नुहोस्, बुझ्नुहोस्। इन्टरनेटमा खोज्नुहोस्, बाहिर जानुहोस्, कुरा गर्नुहोस् । विभिन्न माध्यमबाट आफूलाई र आफ्नो इच्छा रुचिलाई बुझ्नुहोस् । बाहिरको समाजको अपेक्षा र प्रतिक्रियालाई नभई आफ्नो अस्तित्व र इच्छाअनुसारको विषय रोज्नुहोस् ।