रङ र आकारसँग खेल्न सक्ने क्षमतालाई स्थलगत क्षमता भनिन्छ । स्थान र रङलाई कहाँ र कसरी प्रयोग गर्ने, कुन वस्तुलाई कस्तो आकार दिने जस्ता काम गर्न स्थलगत क्षमताको आवश्यकता पर्दछ । यो क्षमता प्रवल भएका मानिसहरूले कुनैपनि स्थानलाई आफ्नो कल्पना अनुसार सजाउन सक्छन् ; आफ्नो भावना तथा अनुभवलाई चित्रमा उतार्न सक्छन् ; प्लास्टिक वा अन्य सामग्रीबाट नयाँ वस्तु उत्पादन गर्न सक्छन् ; व्यक्ति वा वस्तुको शारीरिक छवि सजिलैसँग कोर्न सक्छन् । उनीहरू ग्राफ, चार्ट, टेबुल, चित्र आदिको प्रभावकारी ढंगले व्याख्या विश्लेषण गर्न सक्दछन् । उदाहरणको लागि आर्किटेक्ट इन्जिनियर, ब्युटिसियन, फेसन डिजाइनर, पेन्टर, मूर्तिकार, आदि स्थलगत क्षमता राम्रो भएका व्यक्तिहरू हुन् ।